Fuglar og fuglatalning 7. janúar 2009 Fuglar voru taldir formlega á og í grennd við Akranes á milli jóla og nýjárs 2008. Á þremur skýrt afmörkuðum talningarsvæðum innan kaupstaðarmarkanna sást og greindist 21 fuglategund og á meðal þeirra voru himbrimi, músarrindill, hávella, straumönd, toppönd og teista. Hinsvegar var einstaklingafjöldinn á þessum svæðum ekki mikill að þessu sinni eða einungis um 1700 fuglar og kunna ýmsar skýringar að vera á því hví svo var. Ofangreind þrjú talningarsvæðin á Akranesi voru 1) Svæði 062 : frá og með Leynisvogi og í vestur að og með Suðurflös. 2) Svæði 054A : frá víkinni við Suðurflös, um vestur-Skagann, að og með Höfðavík. C) Svæði 054B : frá Miðvogslæk og inn úr, að og með Blautósi. Ellefu skilgreind fuglatalningarsvæði eru á og við Akranes og ná þau næstum alveg umhverfis Akrafjall. Nokkuð er misjafnt hvað talið er á mörgum svæðum hvert ár og auðvitað er misjafnt hve margar fuglategundir og einstaklingar sjást á hverju svæði hvert sinn. Í jólatalningunni núna sáust samtals um 30 fuglategundir á þeim svæðum sem talin voru á Akranesi og umhverfis Akrafjall. Upplýsingar um fuglatalningarnar má finna á vef Náttúrufræðistofnunar http://www.ni.is/dyralif/fuglar/vetrarfuglar/talning - Á svæði 054A (Sjá að ofan) hafa fuglar verið taldir skipulega um jólaleytið 20 ár í röð, en það er auðvitað ekkert sem mælir gegn því að fuglar séu einnig taldir skipulega á öðrum tímum ársins en á milli jóla og nýjárs! Fuglatalningarmönnum er skýrlega uppálagt að greina nákvæmlega og eftir bestu samvisku frá því hvaða fuglategundir sjást og hve margir einstaklingar eru af hverri tegund á tilteknu talningasvæði daginn sem talning fer fram. ------------------- Það hefur annars staðar komið fram að skipulagðar talningar á fuglum að vetrarlagi, sem oft ganga undir nafninu „jólatalningar“ á meðal áhugamanna, hófust hér á landi árið 1952. Upphafsmaður hugmyndarinnar mun hafa verið Bandaríkjamaður sem starfaði við bandaríska sendiráðið í Reykjavík. Hann skaut þeirri hugmynd að doktor Finni Guðmundssyni fuglafræðingi að rétt væri að telja fugla á Íslandi mönnum til skemmtunar og fróðleiks og hrinti Finnur hugmyndinni í framkvæmd. Allar götur síðan hafa þessar fuglatalningar/jólatalningar farið fram hér á landi, á mismunandi mörgum svæðum, og vel á annað hundrað manns hafa talið þegar flest hefur verið. Enn lengur en frá 1952 hafa menn stundað svipaðar fuglatalningar úti í hinum stóra heimi. Tilgangurinn er vissulega sá að kanna hvaða fuglategundir eru við landið að vetrarlagi, í öðru lagi hvar fuglarnir finnast og í þriðja lagi að gera sér einhverja grein fyrir því hversu margir fuglar eru hér að vetri til. Vissulega er erfitt og nær ómögulegt að komast að „hárnákvæmri“ niðurstöðu um fjölda fuglanna eða hve margar fuglategundir finnast hér á þessum tíma ársins en það má komast að einhverri viðunandi niðurstöðu í þessum efnum. Ekki er ástæða til að hafa áhyggjur af því þótt samviskusöm niðurstaða talningarmanns sýni að á tilteknu talningarsvæði hafi sést „61 snjótittlingur“ á talningardaginn og „29 hávellur“. Ekki ferst heimurinn heldur þótt einhverjir þessara fugla kunni að hafa verið tvítaldir eða einhverjir aðrir fuglar af þessum tegundum hafi komist undan haukfránum augum talningarmanns á talningardaginn! - Nei! - Þá er nú betra árið 2093 að vita að árið 2008 var hér að finna bæði snjótittlinga og hávellur „í þessu magni“! Betra er að vita þetta en ekki neitt þegar og ef á þarf að halda einhverjum hugmyndum um fuglafjöld í áranna rás!

Til baka